أهلا يا أصدقاء .. توصلني أسئلة كثيرة بخصوص هذا الموضوع
ففضلت أطرحه هنا حتى نستفيد من تجارب الكل ..
كنت سابقًا ماعندي عاملة منزلية بوجود أربع أطفال ، كان عدم وجود عاملة مو باختياري الكامل، ظروفي ما كانت تسمح وقتها ..
الوضع من دون وجود مساعدة ما كان سهل أبدًا خصوصا مع نمط حياتنا هنا في السعودية ..
بس الحمدلله عشنا 😂
كنت متعاملة مع العاملات بالساعة مرتين بالأسبوع ، والحمدلله مشى الوضع..
لما توظفت خلاص لازم أجيب عاملة تساعد وأخلي عندها الصغيرة (مع وجود كاميرات) وتستقبل البنات إذا رجعوا لأنهم يرجعون البيت قبلي..
عاد هي جت من هنا وجاء الحجر من هنا 😂
وحتى يوم رجعت أداوم بعد الحجر كانوا البنات كلهم في البيت فكان الوضع مطمئن (ماكنت الصغيرة لحالها معها)..
المهم لما قدمنا على عاملة كنت متخوفة جدًا من أشياء كثيرة،
بس الحمدلله لما جت وجربت وجودها ارتحت جدًا .. يكفي أقوم ألقى البيت مرتب وشايلة حوسة المطبخ وغسيل الملابس ، ولو عندي مشوار أقدر أطلع لحالي وأترك البنات لأني متطمنة وجود شخص كبير معهم..
هل أنصح الناس يجيبون عاملة ؟
ماراح أعلم الناس كيف تعيش حياتها وكل شخص أدرى بنفسه وظروفه ، لكن عن نفسي لو أقدر أجيب زيادة جبت 😂
فيه مهام لازم نقوم فيها بأنفسنا كزوجات وكأمهات وفيه مهام نقدر نفوض فيها ،
وشغل البيت ما يخلص وكلما كثروا أفراد الليت زادت الفوضى ،
والآن مع وجود أفراد المنزل في البيت طول اليوم الفوضى أكثر وهي ما تلحق وأنا أغمض عيني عن تقصيرها دامها باذلة جهدها ومغطية أشياء كثيرة ودامها كويسة معي ومع البنات ..
وأكيد مو كل الناس تجربتهم كويسة مع العاملات، بكل مجال فيه الزين وفيه الشين ..
وأكيد وجودها فيه سلبيات خصوصا للبيوت الصغيرة يصير مافيه خصوصية بس الواحد يوازن بين الأمور ويقرر ..
كيف أختار العاملة المنزلية؟
في السعودية أنصح بالتقديم على مكتب عن طريق مساند تبع وزارة العمل لأن الوزارة تلزمهم يجيبونها لك حسب الأيام المكتوبة في الموقع، وإذا تأخروا تقدرين تطالبينهم ..
أي مكتب ؟ ما أقدر أرشح شي ..
المكتب اخترته كذا من دون توصية وجابوها لي خلال ثلاث شهور ..
أختار أي جنسية ؟ أختار وحدة سبق لها العمل ؟ أختار مسلمة ؟ أختار متزوجة وعندها أطفال أو لا ؟
خلونا نتفق إن هذي المواصفات مالها دخل بشكل مباشر على كونها كويسة أو لا ..
كلها توفيق من ربي ..
وأهم شي الدعاااااء ان ربي يرزقكم القوية الأمينة ويرزقكم الناصية الصالحة
وأول ما تجي سلمي عليها ورحبي فيها وقولي دعاء اللهم اني أسألك خيرها وخير ما جبلت عليه وأعوذ بك من شرها وشر ما جبلت عليه..
ماهي معادلة تسوينها وتطلع لك نتيجة وحدة ..
وكلها تفضيل شخصي ..
المكتب يرسلون لكم السير الذاتية للعاملات اللي عندهم ، وتقدرون تشوفون أشكالهم وتقررون مين ترتاحون لها فيه ناس تنفرون منهم مباشرة..
بقولكم المواصفات اللي اخترتها:
أنا اخترت الفلبين أشوف تعاملهم مع الأطفال كويس ومتقنين لعملهم ، بس هالكلام مو على إطلاقه ..
كل جنسية فيها الزين وفيها الشين ..
اخترت وحدة ماسبق لها العمل عشان ما يصير فيه مقارنات واعملها على طريقتي من البداية، بس غيري يمكن تجيها صدمة من الغربة وتبطل عن العمل 😅
عاملتي عندها طفل .. اللي عندها أطفال تعرف تتعامل معهم .. وتصير حنونة علهم أكثر ، وممكن هذا يخليها تكون جادة أكثر إن أسرتها معتمدة عليها بتوفير لقمة العيش ..
بس غيري ممكن ماتصبر عن أطفالها ..
هل أختار مسلمة أو لا ؟
سمعت ان المسلمين هناك تعليمهم سيء فجبت وحدة مسيحية والحمدلله أسلمت عندنا قبل فترة ❤️
مع ان المسلمين أولي بالدعم ،
كيف أتعامل مع العاملة المنزلية ؟
باليوم اللي وصلت فيه حرصت البيت يكون مرتب عشان تعرف المستوى اللي أبي البيت يكون عليه ، مابها تآخذ فكرة اننا حوسة وفوضويين..
أول ما وصلت رحبت فيها أنا والبنات وحضناها (هي كانت خايفة ياعمري وارتاحت شوي) وقلنا لها حنا عائلتك الثانية وخليتها ترتاح أول ليلة أكيد بتكون تعبانة من السفر ..
كنت مجهزة مكان نومها
(سرير ومخدة وغطاء )
سلة غسيل
يونفورمات حبتين عشان يمكن يكون مو مقاسها
حجاب (المخنق القطن) اذا تبونها تتحجب بالبيت(أنظف بعد وقت الطبخ)
ممكن بيجامة
وسناكات بسيطة وقهوة وجهزت لها أندومي وزر أغلبهم أول ما يجون ما يحبون يجربون أكل جديد ..
من بكرة جلست معها وقلت لها قوانين البيت ..
أنا ما كان لي تجارب سابقة فبعض القوانين قلتها لها متأخر 😂
والأفضل بعد تعطونها جدول بالمهام المطلوبة منها (مهام يومية/ أسبوعية/ شهرية) فيه جداول جاهزة أنا أخذت واحد وعدلت عليه
اكتبوا بقوقل
Printable House Cleaning Schedule and Checklist
بالنسبة لي طبعته من هنا :
https://www.vertex42.com/ExcelTemplates/house-cleaning-schedule-checklist.html
وعلموها قومها وموعد نومها واذا فيه استراحة بالنص ..
القوانين مثل :
– ممنوع تصور البنات أو البيت بجوالها
– اذا تبي شي تكلمني ما تكلم زوجي
– اذا زوجي موجود ماتصير بنفس المكان
– الجوال ممنوع وقت العمل
– ماتشغل المكنسة إذا فيه أحد نايم ..
– ماترد على الجرس ولا تطلع برا البيت من دون إذن ..
– الأكل قلت لها إذا تبي أي شي تآخذ من الثلاجة ..
وبالنسبة لي عطيتها نت البيت وتستخدمه اذا راحت غرفتها ..
وبين كل فترة والثانية أعطيها إجازة يوم اذا كنا بنطلع أقول لها تاخذ راحة ذاك اليوم عشان أكسبها ❤️،
واذا سهرنا برا البيت وهي معنا اقول لها من بكرة تبدأ شغلها متأخر ..
وقت العزايم أحرص انها تجي اذا كان فيه عاملات زيها تسولف وتغير جو ..
وقلت لها اذا جتك الدورة علميني أخليها تشتغل نص يوم ..
ولا تنسونهم بالأعياد وبين فترة والثانية تجيبون لها اشياء بسيطة ..
احتسبوا الأجر فيهم وعاملوهم بإحسان .. ما اضطروا لهذا العمل والغربة الا لحاجتهم 💔
إنما ترزقون وتنصرون بضعفائكم ..
مهم تقرون لائحة العمالة المنزلية ..
