15 شيء يجب فعله قبل الولادة..

أهلا وسهلا أصدقائي ..

فترة مابعد الولادة فترة تنشغل فيها الأم بمولودها .. والتجهيز المبكر وإنهاء الأعمال بوقت مبكر مريح جدًا ويعطيك فرصة للتفرغ بهذي الفترة لنفسك ورضيعك ..

الأهم الاستعداد النفسي والاستعداد بثقيف النفس بهذي المرحلة (الولادة ومابعدها) سواء بالنسبة لك أو بالنسبة لمولودك .. لأن الخرافات المنتشرة بمجتمعنا بهذي المرحلة خرافات كثيرة مالها أي مستند علمي وأكثرها ضررها أكبر من نفعها ،، غير النصائح اللي مالها أول ولا آخر تنهال عليك من كل صوب سواء طلبتيها أو لا .. فالتثقيف مهم جدًا للحماية من هذي الخرافات الي مالها أي أساس من الصحة ..

والتعامل اللي أستعمله تجاه هذي النصائح هو التسليك لأن بعض الشخصيات ما ينفع النقاش والجدال معها وأنا صراحة بشتري راحة بالي ..

 

 

1- التجهيز للمولود الجديد :

أفضل تجهيز الملابس التي أحتاجها في الشهرين الأولين،

في هذا العمر ما أفضل أكثر قطع لأن الطفل بسرعة يكبر وفيه أطفال يكونون أصغر أو أكبر من عمرهم فالاستعجال بالشراء خيار غير موفق ..

الأشياء اللي أشتريها هذي الفترة:

• خمس قطع داخلي لون أبيض قطن
• وخمس قطع بربتوز قطن كامل (أحب نكست شريت من موقعهم أسعاره جميلة وجودته حلوة وأشكاله جميلة) هذا
• المهادات .. أفضلها النوع اللي يكون مقاسه ١٢٠* ١٢٠ تكون مهادات وبطانية وغطاء رضاعة في نفس الوقت .. هنا طريقة تمهيد المولود بالفيديو ..
• مصاصة من ايفينت
• رضاعات – حتى لو نويت ترضعين طبيعي راح تحتاجينها وقت ما تشفطين حليب- اخترت هذا نوع تومي تيبي
• فوطة وليفة وكرسي غسيل
• مخدة عشان يكون راس البيبي مستاوي

أما باقي الأشياء مثل العربية والجلاسة والأجهزة غير الضرورية أنصح بتأخير شراءها خصوصا للمولود الأول لأنها ممكن تجيك كهدية ..

بالنسبة قائمة بالأشياء الي ببالي للمولود (wish list) إذا سألني أحد المقريبن يكون عندي خيارات .. واذا محد سألني ولا جتني كهدية أكون باحثة ومقارنة ومختارة .. وما أسهل الشراء عبر الانترنت وخلال كم يوم عند باب بيتي

تدوينتين مفيدات من ديمة و أروى العمراني في أغراض المولود الجديد ..

 

 

٢- تجهيز احتياجات النفاس والأمومة :

هالفترة راح تحتاجين فيها أشياء مثل (جالسة أجهز تدوينة مفصلة عن العناية بعد الولادة)

• فوط صحية كبيرة الحجم (امتصاص عالي) واذا كان النزف كثير فيه كلوت للكبار يباع بالصيدليات وفيه خيار ثاني أرخص وهو استخدام حفاظات أطفال (آخذ كيس فيه ١٠حبات مقاس كبير وأقص أطرافها) ممتازة للأيام الأولى وأريح من تغيير الملابس والمفرش ..
• واقي لمرتبة السرير  watherproof أفضل نوعين جربتهم حق ايكيا و هذا النوع من أمازون ..
• مشد للبطن .. هذا المشد الثلاثي ممتاز لدعم الظهر والبطن والحوض ، أيضًا يساعد في رجوع شكل البطن .. يفضل لبسه من أربع إلى ست أسابيع
• حمالة صدر مخصصة للرضاعة حبيت هذا النوع من motherhood
• كريم للصدر لمنع التشققات مع الرضاعة وما يحتاج مسح ..
• ملابس مناسبة للرضاعة .. ممكن تكون بأزرار أمامية أو تكون من النوع اللي ينفتح مثل هذي البديات 
• غطاء الرضاعة
• شفاطة الحليب

 

٣- ممارسة تمارين كيجل :

التمارين هذي مهمة جدًا لكل امرأة ومهمة جدددا للمرأة فترة الحمل وبعد الولادة ..

ليه ؟

مهمة وقت الحمل لأنها تقوي عضلات الحوض وتساعد جدًا في وقت الدفع .. وتساعد جدًا ان الولادة تصير بدون شق العجان ..

أيضًا مهمة بعد الولادة لأنها تقوي عضلات الحوض والرحم والأمعاء والمثانة ولو حدث شق تساعد على التشافي منه وعلى رجوع المنطقة مشدودة

البعض بعد الولادة يجيهم مثل سلس البول (عدم القدرة على التحكم بهذي العضلة) المنطقة تكون عضلاتها ضعيفة وعلاجها يكون بممارسة هذي الرياضة

وطبعا ممارستها قبل الولادة تقي من هذا الشيء والأهم إنها سهلة ويمكن ممارستها بأي مكان ولها أكثر من وضعية ..

(بكتب عنها بالتفصيل بموضوع العناية فترة مابعد الولادة)

 

 

٤- تجهيز شنطة المستشفى ..

تجهيز شنطة المشتسفى بوقت مبكر مريح جدًا (قبل الأسبوع 36) لأن اذا جهيزتيها في اللحظة الأخيرة راح تنسين أشياء كثيرة .. وراح تتعبين ويتعب معك زوجك في التوصية على أغراضك هذا اذا عرف مكانها وجاب الشيء الصحيح الي تبينه ..

الأشياء الي تستخدمينها مثل شاحن الجوال اذا ما عندك غيره ولازم تاخذينها قبل ما تطلعين اكتبوا ورقة وحطوها داخل الشنطة أو تكون بملاحظات الجوال عشان ترسلينها لزوجك أو أمك ..

هذي قائمة سريعة:

• سراويل طويلة ماسكة من تحت
• بلايز مناسبة للرضاعة (لها أزرار من فوق) أو إذا تحبين روب مع بدي رضاعة
• ملابس داخلية وشرابات تدفي
• سليبر أو كروكس سهل اللبس
• فوطة لك
• ملابس للبيبي 2 داخلي 2 بربتوز مهاد وبطانية
• أدوات عناية شخصية (مشط وكريم ومرطب شفايف وشامبو وصابون وغسول وممكن مكياج خفيف) خذي علب صغيرة وعبيها مع إني أفضل أغسل شعري بالبيت قبل ما أروح وبعد ما أرجع .. بالمستشفى ما أحب أغسل شعري..
• شاحن جوال – شاحن متنقل
• اذا تحبين مخدتك وبطانيتك
• اذا يهمك تصورين الطفل صورة احترافية جهزي الكاميرا واشحنيها وتأكدي من وجود مساحة كافية في الذاكرة
• مطارة ماء مهمة جدًا ..
• سدادات أذن وغطاء عيون

للمزيد اطلعوا على تدوينة أروى و تدوينة ديمة

 

 

٥- التنظيف والترتيب الدقيق للمنزل / إنهاء أي مشروع منزلي معلق

(زنقة زنقة دار دار دولاب دولاب) لازم ترتبينها قبل ولادتك ..

حطي ببالك انك في الأربع شهور القادمة بيكون نظامك منحاس وماعندك وقت لهذي الترتبيات (ترتيب وتصفية بنفس الوقت) .. إما تسوينه الآن أو ما راح تسوينه خلال الست الشهور القادمة

خصصي ساعة أو ساعتين باليوم للتنظيف الدقيق قسمي دواليب الغرفة / المطبخ الثلاجة والفريزر واشتغلي عليها شوي شوي  وطلعي أي شيء ما تحتاجينه ..

بالنسبة لي صلاحية هذا الترتيب من أربع إلى ست بعدين أحتاج أرتب من جديد ..

اذا عندك أطفال أكبر صفي ملابسهم للموسم القادم واكتبي النواقص اذا فيه عيد أو مدارس جهزي لهم قبل ولادتك .. هذا الوقت يعتبر ذهبي بالنسبة للأشهر القليلة بعد الولادة ..

ممكن تستعينين بشركة لتنظيف السجاد والكنب والستاير …

 

٦- غسيل ملابس المولود وأي شيء تلمسه بشرته

مهم جدًا غسيل الملابس بعد شراءها أو تخزينها .. أيضًا غسيل المهادات / البطانيات / المفرش / مخدة الرضاعة / غطاء كرسي السيارة / غطاء الجلاسة

استخدم صابون طبيعي مثل الوزير (مهم جدا نقعه بماء حاار عشان يذوب بعدين استخدموه مباشرة اذا تأخرتوا يجمد)

أحب أغسل الملابس في الشهر التاسع لا تستعجلون عشان ما تغبر من جديد مع أجواء الرياض

والأفضل حفظها بصندوق محكم الإغلاق ..

 

٧- شراء سرير المولود وتجهيز مفرشه الخاص ..

جهزي السرير من الشهر التاسع أو الأسبوع ال ٣٦ من الحمل ..

اذا كنتِ تخططين للرضاعة الطبيعية ممكن يساعدك السرير المخصص للرضاعة من شيكو

لما كنت أرضع بناتي كنت أتعب لما أقوم أشيلهم من سريرهم بعدين أرجعهم وعشاني أكون دايخة كنت أعتمد بيدي على حواجز السرير ونتج عنها كدمات زرقاء (يارب شرحي واضح)

هذا السرير مريح إن الطفل يكون جنبك وبنفس الوقت محمي من الحوادث اللي نسمعها من الجدات (نامت على ولدها وانخنق)

 

الأفضل نوم الرضيع مع أمه بالغرفة حتى عمر سنة على الأقل وهذا جزء من احتياجه العاطفي في هذا العمر ..

 

٨- تجهيز كرسي السيارة ..

عني ما أفضل تركيبه عشان أجواءنا الجميلة .. لكن ممكن تركبينه وتغلفينه بكيس .. بعض الكراسي تركيبها مو سهل وبعض المحلات تركبه لك اذا شريت من عندها مثل مذركير ..

بجنى جاني الكرسي هدية وما عرفنا نركبه كمستجدين في عالم الطفولة ههه رحنا سنتربوينت وركبوه لنا من دون مقابل، كنا رايحين صباح والموظفين رايقين جزاهم الله خير ..

كرسي السيارة مهم جدا جدا لكل الأعمار وللأسف مو منتشر عندنا

أولا يوفر حماية للطفل لو صار حادث لا قدر الله .. مو بس حادث لو توقف السيارة فجأة الكرسي يحميه من الاصطدام ..

أما وجود الطفل بالحضن وقت الاصطدام ممكن يطير الطفل الى الزجاج الأمامي للسيارة ..

ثانيا : يوفر حرية للأم وراحة .. أحيانا نضطر ننزل الكرسي مثل لما يركبون معنا ناس وتصير مأساة واذا كبر الطفل شوي النقاب يصير قراج ..

(بحاول أكتب تدوينة مفصلة)

 

٩- فرزنة سناكات أو وجبات خفيفة

خلال فترة الحمل والرضاعة تفقد الأم كمية كبيرة من المعادن والفيتامينات .. الجسم يحتاج من ثلاث إلى أربع سنوات حتى يستعيدها .. لذلك يفضل عدم الحمل مرة أخرى الا بعد مرور هذه المدة

تجهيز الوجبات من الأشياء اللي تساعد جدًا في عدم التخبيص بالأكل خصوصا وقت الأزمات وقل النوم ..

وما أجمل أن تجد وجبة صحية جاهزة بعد يوم متعب (أحس جسمي يقول لي شكرا)

مقترحات لأشياء يمكن فرزنتها:

• فواكه مقطعة مقسمة بأكياس جاهزة لعمل سموذي .. توضع بالخلاط مباشرة.. مثل (موز – تفاح – توت مجمد – برتقال – وممكن سبانخ)
• شوربة خضار أو أي نوع شوربة تفضلينها .. بشرط مافيها كريمة خفق
• ماء لحم أو دجاج (مفيد ومدر للحليب)
• كيكة تمر أو كوكيز شوفان
• قرانولا بار

هذي تدوينة مفيدة من الصديقة مها في الإعداد المسبق للوجبات شوفوا اللي يناسب فترة النفاس..

 

 

١٠- التأكد من مخزون البيت 

إذا كنت تخطيين لقضاء فترة النفاس في بيتك تأكدي من وجود إمدادات كافية مثل المناديل وصابون الأيدي وصابون الصحون وصابون الملابس الغسيل المنظفات وأي شيء يستهلك .. ممكن تآخذين جولة في المنزل والمستودع لمعرفة النواقص ..

 

 

١١- رتبي وضع أطفالك الآخرين 

إذا كان لديك أطفال أكبر سنا اكتبي الكاتلوج الخاص فيهم للشخص اللي راح يراعهم أثناء تواجدك في المستشفى أو فترة النفاس

أوقات نومهم وغفواتهم – نوع أكلهم – المزاج الخاص فيهم – أي معلومة مهمة ومفيدة ..

اذا كانوا بينامون عند أحد وقت تواجدك في المستشفى جهزي شنطتهم وملابسهم ..

 

١٢ – جهزي أطفالك لأخوهم :

مهم جدًا تجهيز نفسية طفلك الأكبر لاستقبال أخوه ..حياتهم أكيد بتتأثر فمهم جدًا تهيئتهم .. كثفي قصص بهالفترة وصور لإخوان متحابين.. خليهم يساعدونك في اختيار بعض ملابس أخوه ..

بناتي شرحت لهم إن البداية يكون نايم وبس يشرب حليب ومايقدر يتكلم أو يجلس أو ياكل ..

حملت تطبيق بيبي ستر وكل أسبوع أقول لهم تعالوا نشوف البيبي وش صار شكله وأقرا لهم التغيرات اللي صارت هالأسبوع (صار يسمع نبت له شعر …. الخ) وخليهم يحطون يدهم على بطنك ويحسون بحركة الجنين ..

التهيئة تخفف عليك وعلى طفلك .. أيضًا مهم أعلم الطفل اني راح أنام يومين في المستشفى وهالفترة بينام فيها عند جدته مثلا .. أستخدم القصص بأسماء ثانية وسيناريو القصة يكون بالأشياء اللي أبيها تصير ..

(راح عند جدته وانبسط مرررة لعب بالحوش وراح للسوبر ماركت ووو … )

من الأشياء اللي تساعد تجهيز هدية لأطفالك الأكبر يخفف الغيرة ويشغلهم ..

بعضهم يقولون لأطفالهم إن هذي الهدية من البيبي بس قرأت كلام ضدها وأنا أحسها استخفاف بعقل الطفل شلون بيبي لا حول له ولا قوة ما يقدر يتحدك بس ينام وجايب هدية هههه

جربتها ببناتي وقالوا لي جايبة هدية من بطنك ..صار سوق مو بطن ،،

أحس الأفضل تقولون لهم عشان صار عندك أخو / أخت جديدة ..

خصوصا انهم يشوفون الهدايا اللي تجي للمولود وأكيد راح يغارون فحلو يكون فيه شيء لهم وأنت كأم تعرفين الأشياء اللي يحبونها والمناسبة لهم ..

 

١٣ – إنهاء متعلقات العمل ..

اذا كنتِ موظفة أو مرتبطة بأي جهة أنهي كل متعلقات العمل عشان تتفرغين فترة إجازتك لنفسك ولرضعيك .. آخر شيء تبينه هو اتصال من العمل .. أي أوراق ومستندات أو مشاريع تحتاج تسليم سلميها وعطيهم خبر بوقت الإجازة ومدتها (حسب نظام الإجازات عندكم)

 

 

١٤- عيشي لحظك .. 

لا تقضين فترة حملك بانتظار الولادة عيشي اللحظة .. إذا كان حملك مستقر وتقدرين تسافرين سافري  خصوصا في الفترة الذهبية بعد الشهر الرابع وقبل الثامن .. يكون الوحم خلص وتوك ما ثقلتِ

اطلعي مع زوجك وأطفالك وتمشي.. اسهري مع صديقاتك ..

بعد الولادة بيكون صعب ترك مولودك عند أحد وصعب أخذه لبعض الأماكن الغير مهيئة (إلى عمر معين)

خذي صورك لك وأنت حامل .. لما كنت حامل بجنى صورني زوجي صورة عفوية وكانت قبل يوم بولادتي وصارت ذكرى جميلة 🙂

 

١٥- اشبعي نووووم

صحيح النوم ما يتخزن وأساسا الحمل يخلي نومك أكثر وأثقل لكن وجود مبرر لك وللي حولك يخفف من الوضع :p (أودع النوم وراي سهر)

 

 

أتمنى لك ولادة سهلة ميسرة ورحلة أمومة جميلة .. 

 

طاب يومكم ..