تجهيزات بناتي للمدرسة

الحمدلله رجع الدوام والترتيب من غير شر، رغم إنهم سلموا المناوبة الصباحية للينة

بس صار عندي كم ساعة أقدر أنجز وأروق فيها ..

حبيت بهالتدوينة أشارككم بالأدوات للي أخذتها لبناتي :

المريول من محلات المراييل العادية مافيه شي مميز فماراح أفصل فيه 🙂

البلوزة البيضاء أخذت لهم بلوزة ثلاث أرباع من موقه نكست دايركت سعرها جدًا جميل مقابل جودتها وخامتها. (الموقع ممتاز وأسعارة جميلة والتوصيل مباشر ومجاني للطلبات فوق ١٨٠ ريال)

أخذت لهم أكبر من مقاسهم بسنة (جنى أخذت لها ٧ وندى ٥) وصار طولها جمييل مرة ثلاث أرباع ومرتبة جدًا باللبس ..

ليه ثلاث أرباع ؟ لأنها أنظف بكثير،، لما يكتبون لما ياكلون لما يمسكون شي بيدهم يبقى طرف البلوزة بعيد عن هالأشياء .. ممكن تطلبون الكم الطويل وتطوونها بحيث تكون ثلاث أرباع ..

أخذت لهم جاكيت خفيف رسمي من نفس الموقع

الحذاء أديداس من القرعاوي قاليري، الدور الثالث طول السنة تخفيض وعندهم مقاسات وشركات كثيرة طلع لي سعر الحذاء ١٠٥، سعره مناسب جدًا بالنسبة لحذاء رياضي يكرف طول السنة رغم اني مريت سكتشرز الأوت لت وكانت أسعاره بحدود ١٧٠ أحاول أكبر مقاسهم شوي عشان تستمر معهم باقي السنة

الشنطة

أخذتها من بوتري بارن ، بما أن لي تجربة سابقة ناحجة معاهم ، شريت لبناتي منهم قبل ٣ سنوات يآخذونها للزيارات وللسفر ولكل مكان وأغسلها وترجع جديدة ، تستاهل سعرها صراحة. أخذتها وت ما سووا تخفيض بس ما كان فرق السعر كبير .. الشنطة فيها أحجام حسب طول الطفل أنا أخذت لجنى small (أولى ابدتائي) وأعتقد تكفي للصفوف الأولية ، أما ندى (تمهيدي) نفس شنتطها اليمن ثلاث سنين :p حجم pre-k

فيها أكثر من جيب, وحزام ينربط من قدام عشان تكون قريبة من جذع (الأفضل يكون حول الخصر) ، جيب خارجي على جنب لمطارة الماء، قابلة للغسيل في الغسالة

طبعًا لازم يكون وزن الشنطة مناسب لوزن الطفل وطولها مناسب لطوله (ماتكون نازلة عن ظهر الطفل) عشان ما تسبب مشاكل في الظهر والعمود الفقري ومشاكل العظام والمفاصلالوزن الصحيح يكون بين ١٠ – ١٥ ٪ من وزن الطفل (مع الكتب والمستلزمات والوجبة )

ولو بتآخذون اللي فيها عجلات لازم يكون مقبضها مناسب لطول الطفل عشان ما يضطر للانحاء وهو يسحبها..

شنطة الوجبة من نفس المحل بوتري بارن .. عندهم أكثر من شكل  ، إذا بتشترون منهم هذا الفيديو يساعدكم

علب الوجبة أخذتها من أمازون شركة Rubbermaid يجي معها قطعة تنحط بالفريزر أو الثلاجة عشان يبقى الأكل بارد وما يذبل (مثل الفواكه)

وعند ساكو شركة جودتها ممتازة Sistema وفيه منها أحجام أستخدم كبير للسانوديش

و صغير للفواكه أو الخضار أو المكسرات.

وعندهم شركة TATAY ممتازة أستخدم علبهم للمطبخ و للمدرسة، تجي مجموعة مع شنطتها وتجي منفصلة بأحجام وألوان متنوعة ..

أهم شي تهتمون فيه باختيار علب الوجبات انها تكون مصنوعة من البلاستيك الآمن وشعاره  BPA free

وبالنسبة لي مناسبة لغسالة الصحون Dishwasher safe و يفضل تكون آمنة للمايكرويف والفريزر

هذي الشعارات ممكن تساعدكم في اختيار العلب المناسبة

أول علامة تدل إنها مصنوعة لاستخدام الأكل وتجي بعدة أشكال

ثاني علامة إنها آمنة لغسالة الصحون في الرف العلوي

ثالث علامة نفس الشي (آمنة لغسالة الصحون) شعار غير رسمي لكن قد يستخدم

الرابع امن للمايكرويف ويجي بعدة أشكال

الخامس امن للفريزر ويجي بعدة أشكال

المطارة من شركة Thermos طلبتها من أمازون ميزتها تحفظ الحرارة والبرودة وفيها مكان للتعليق بالشنطة بخيط عشان ما تضيع .. معروفة هذي الشركة رقم واحد في إنتاج أكواب حفظ الحرارة .. ممكن تستخدم للعصير المعد منزليا أو المشروبات الدافية ، عيبها الوحيد وزنها لأنها من الستيل..

 إذا تبون شي أخف خذوا شركة CamelBak  ممكن تطلوبنها من هالموقع (ىوصل مجانًا للطبات اللي ب ٢٠٠ ريال) وموجودة في سنتربوينت (انتبهوا فيه حجمين الحجم الصغير للأطفال ما تحت سن المدرسة)

المقلمة طلبتها من أمازون ، جميلة ولطيفة وحجمها حلو للأطفال ..

التجليد جابت لي أمي يعطيها العافية تغليف مقصوص وجاهز بحجم الكتب موجود بالمكتبات أخذت شفاف من روكو

حطيت شريط لاصق وردي على طول الكتاب بعدين التغليف الشفاف فوقه، عشان يصير كتابها مميز وبنفس الوقت غلاف تقد تتعرف على الكتاب بسهولة. وحطيت هالشريط الوردي على أقلامها ومساحتها

كتبت اسمها بقلم فلومستر غير قابل للمسح على كل أغراضها، مطارة براية، ملفها المقلمة كتبت اسمها من داخل وحتى شنطتها.  حتى الجاكيت مهم جدًا تكتبون اسم الطفل عليه ..

*ملاحظة: 

كل الأشياء اللي طلبتها من أمازون بهالتدوينة تنشحن مباشرة للسعودية، حطوا عنوانكم الوطني اللي بواصل ويوصلكم إما على البريد السعودي أو فيدكس وسعر الشحن يطلع لكم وقت الدفع ولكم الخيار إذا يناسبكم أو لا .. طبعًا كلما طلبتِ أكثر كلما نقص سعر الشحن بالنسبة للقطعة الواحدة يعني مجموع سعر هالأشياء مجتمعة أرخص من مجموع شحنهم منفصلات .. كمثال: الأشياء اللي طلبتها بهالتدوينة هي (المطارة – علب الوجبة (مجموعتين كل مجموعة ٤ قطع) – المقلمة) هذا سعرها (٤٧ دولار) وسعر الشحن (٢٦ دولار) أشوفه مناسب جدًا ، متاجر انستقرام تآخذ ٥٠ ريال للتوصيل داخل الرياض وهذي الأشياء جاية من أمريكا بتوصيل ما يتجاوز ١٠٠ ريال .. علمًا أن مو كل بضاعة أمازون تنشحن للسعودية بعضها بس داخل أمريكا ولها طريقة ثانية في الطلب وبعضها تنشحن بس بسعر مبالغ فيه ..

وسنة دراسية موفقة للجميع ❤️