أهلا السلام عليكم .. بشارككم تجربتي مع جهاز ألعاب الفيديو النيتيندو سويتش nintendo switch

بالبداية ما كان عندنا جهاز لعب فيديو كان عندنا آيباد فقط لكن عندي مشكلة مع الآيباد،

١- الجلسة الغير صحية ..

٢- والاعلانات في الألعاب

٣- مرات يسكرون اللعبة ويفتحون اليوتيوب وصراحة اليوتيوب يخوف من دون اشراف .. وصعبة علي الاشراف أبي جهاز يلعبون فيه وبنفس الوقت يلهون عني أقدر أنجز أشغالي أو أشرب قهوة يعني ما أشرف عليهم ..

شريت لهم كمبوتر مكتبي وحملت عليه ماين كرافت اللعبة رهييبة مرة يناتي ابدعوا فيها واللعبة تحفر الحس الابداعي يجمعون مواد بعدين يبنون فيها بيوت طابقين ويصممونها جدا جميلة اللعبة ..

ليت بناتي وقفوا عند هالحد

بعدها البنات تفتحت عيونهم على أجهزة الفيديو وصاروا يطالبون فيها .. ومابي أحسسهم بالنقص وأبي أعطيهم مساحة للعب .. أنا مع الوسطية والتقنين .. سألت أختي هي شارية الجهاز قبلي ومدحته لي 
وأشوفه أفضل جهاز مخصص للأطفال من حيث نوع الألعاب وتصميم الجهاز
السوني أحسه موجه للكبار
الجهاز شريته من جرير (عشان الضمان) ماكان فيه فرق سعر كبير بينه وبين أمازون ..

لقيته بموقع نون أرخص لكن الضمان مو ضمان الوكيل فخفت أجازف ..

لكن الاكسسورارات كلها من أمازون
وهذا عيب الجهاز يحتاج اكسسورات كثيرة وماهي رخيصة بتكلفكم كثير والألعاب نفس الشي كلها بحدود 150 ريال وأكثر ..

طلبت من أمازون اكسسوارات مع لعبتين كلفتني حول ألف ريال:

شنطة مو ضرورية اذا ماراح تتنقلون فيه

وعلبة للألعاب :

الألعاب إما تشترونها على شكل كارد أو تشترونها من متجر داخل النيتيندو وتتحمل عليه ..

ويدة برو :

مسكتها أحسن ،

وقاعدة شحن اليدات تنشحن على الجهاز نفسه لكن أنا خفت يطيح وهم يركبونها ويفكونها فشريت هذي القاعدة لأن تركيبها وفكها شوي صعب

 حماية للشاشة :
الجهاز يجي شاشة مع يدة تحكم .. وفيه قاعدة تقدرون تشبكونها في التلفزيون وتلعبون فيها ..
(حنا دايم نلعب في التلفزيون) 


الألعاب:

بناتي معلقين على لعبة (سبلاتون) فيها مراحل وفيها اون لاين لكن ميزة الاون لاين ان مافيه تحدث مع باقي الفريق ..
ومشكلة اللعبة ما نقدر نكتم الموسيقى فنكتم الصوت كامل .. اليدة تتحرك مع حركة اليد لكن شلت هذا الخيار من الاعدادات لان انقلب راسي والشاشة تتحرك .. جربنا بعد لعبة ماريو بارتي جمييلة ويمكن يلعب فيها أربع لاعبين وكثير ألعاب تعتمد على الحركة والتركيز ، مرات ألعب معهم فيها

لعبة سباق ماريو ممتازة بعد ، وحملت لهم ماين كرافت بالنيتيندو (أحبها مرة حملتها لهم لكل الأجهزة آيباد وكمبيوتر ونيتيندو)

فيه تطبيق تابع للجهاز أحسب لهم منه وقت ويطفى عليهم اذا خلص الوقت بعدين احسب للثانية ويسكر عليها .. واهم شي اقدر احسب لهم وانا برا البيت .. انصحكم تشوفون الفيديو اللي حطيته بآخر صورة فيه معلومات مهمة قبل الشراء .. هل يستحق الشراء؟
تجربتي معه كويسة وانصح فيه للي يبي يشتري جهاز العاب لأطفاله .. لكن لو أطفالكم ما طالبوا بشي لا تشترونه .. وبالتوفيق للجميع ..